La Coordinadora Ecoloxista critica’l doble discursu d’Álvarez-Cascos col tema de la incineradora

La postura que tomó Francisco Álvarez-Cascos nel Plenu d’Investidura sobre la incineradora ye oxetu de crítiques pola Coordinadora Ecoloxista d’Asturies. El coleutivu acusa al llíder de FAC d’utilizar “un doble llinguaxe” nesti tema.
 
“Mentes que nel programa eleutoral de Foro Asturias mostrábase nuna posición ambigua, na campaña eleutoral Álvarez-Cascos y los sos candidatos llocales manifestábense a favor de vecinos y ganaderos, y dexaben nidio en público la so postura contra la incineración de residuos defendiendo ‘priorizar la calidad de vida de los ciudadanos frente a los costes nel proyeutu de la incineradora’”, recuerden los ecoloxistes, que llamenten que a la hora de la verdá, el llíder de FAC decida siguir la mesma política nesti tema que’l PSOE. “La única diferencia paez ser un cambiu de manes de la xestión del proyeutu; pero non no que supón esa opción y les repercusiones que va tener na calidá de vida, el mediu ambiente, los puestos de trabayu o la destrucción de materies primes n’Asturies”, continúen nun comunicáu.
 
En concreto, nel Plenu d’Investidura, Álvarez-Cascos señaló la so intención de siguir alantre col proyeutu de la incineradora con trés condiciones: la ellaboración de una tramitación medioambiental rigurosa, l’usu de la teunolóxía más avanzada pa minimizar la contaminación y un soporte presupuestariu plurianual que garantice la financiación adecuada. “Álvarez-Cascos manifiéstase de forma contradictoria. Fala de crear puestos de trabayu, de favorecer a los emprendedores y de la calidá ambiental, pero anuncia una opción que va contra tolo anterior. Los fechos son los que son, la realidá de la incineración de residuos ye la que ye y les pallabres d’Álvarez-Cascos son les mesmas que les d’Álvarez Areces”, afirma la Coordinadora.