Pérez-Espinosa y Álvarez-Cascos muestren les sos diferencies

La intervención d’Isabel Pérez-Espinosa na Xunta Xeneral y la réplica de Francisco Álvarez-Cascos dexaron nidies les diferencies ente PP y FAC. El llíder de Foro Asturias llamentó l’actitú “reaccionaria” de la popular frente a les sos propuestes.
 
“Piden un respaldu ensin fisures a cambiu de nada: nin gobernar, nin intervenir, nin facer valer los nuesos puntos de vista; un papel de comparsa al traviés d’una carta blanca. Nun tamos dispuestos a que los votos que nos traxeron hasta equí sían desprestixaos por naide. Debémonos a los 119.000 asturianos que depositaron la so confianza en nós y ye namái a ellos a quienes debemos una fidelidá ciega”, enunció Pérez-Espinosa, segunda persona n’intervenir güei na Xunta Xeneral tres Jesús Iglesias. La diputada recordó al so compañeru antiguu de partíu que falta a la verdá cuando diz que tien l’apoyu de los asturianos, puesto que “nin dispón de la mayoría absoluta de la Cámara, nin de la mayoría de los votos” y añadió que la tónica de los alcuentros ente dambes formaciones de les selmanes últimes nun paeció en nada “a una mano tendida”. “Nun somos incoherentes y por eso nun aceptamos firmar la so fueya en blanco; deme la garantía d’una llexislatura tranquila”, solicitó.
 
Pela so parte, nel derechu a réplica, Álvarez-Cascos llamentó l'actitú “reaccionaria” de Pérez-Espinosa frente a les propuestes de Foro Asturias Ciudadano (FAC) y señaló qu’oponese por norma a lo nuevo, aunque sía lo qu’ún mesmu proponía como nuevo hai unos años, ye yá “la sofisticación máxima nel exerciciu de la incoherencia”. El llíder de FAC definió asina’l refugu del Partido Popular (PP) a la creación de la Universidá Politéunica Xovellanos en Xixón que’l PP incluyía na campaña del 1999. “¿Por qué pasó del progresu al reaccionarismu?, entrugó’l presidente futuru d’Asturies a la vocera popular. D’igual forma, calificó’l discursu de Pérez-Espinosa de “tán prepotente y teóricu” que solo sería apropiáu pa dalguien que ganase les eleiciones. “Nun hai pallabres ‘humildá’ nin ‘autocrítica’ nin ‘realismu’ nos sos planteamientos”, resaltó.
 
Nesta llinia, el llíder de FAC reseñó que “cuando ún ye la tercer fuercia política y perdió la metá de los votos, sería bono que tolos ofrecimientos al diálogu foran consecuentes col mensaxe de los asturianos el 22 de mayo”. “La confianza ye un valor que cuando esiste nótase y cuando non, tamién”, añadió.