Bloque-UNA considera que la política llingüística de FAC “conduz a la desapaición del idioma”

Yolanda Huergo, vocera de Bloque-UNA, calificó de “probe y preocupante” la referencia que fixo Álvarez-Cascos a la llingua asturiana’l martes na Xunta. La coalición cree que la política llingüística de FAC “conduz a la desapaición del idioma”.
 
La formación nacionalista, nun comunicáu, critica que la llingua asturiana nun ocupara “nin un párrafu” del discursu de dos hores d’ayeri d’Álvarez-Cascos na Xunta Xeneral y que’l presidente futuru d’Asturies tuviera “nenguna propuesta novedosa pa cola llingua”. “A la ‘llingua viva del nuesu pueblu’, como la denominaba Xovellanos, despachóla en dos llinies refiriéndose namái al desarrollu de la Llei d’Usu y l’apoyo a los escritores”, apunta Huergo, que recuerda que “la situación de la llingua asturiana ye dramática y requier midíes ambicioses y urxentes en tolos ámbitos; nun basta col apoyo a la lliteratura”. D’igual forma, “frente a la necesidá d’un marcu llegal nuevu y una normalización efeutiva”, la vocera de la coalición apunta que “Cascos namái fala de desarrollar la llei del añu 98”, polo que “la so declaración d’intenciones queda perbaxo de les que facía Areces”.
 
“El discursu de Cascos apunta a que la so política va a ser continuista cola del PSOE, centrada na ‘promoción’ del asturianu como una parte más del folclor del país, y eso yá sabemos a lo que conduz: a la desapaición del idioma”, continúa Huergo, que considera la posición del llíder de Foro Asturias Ciudadano (FAC) como “una burlla a los que consideramos, como Xovellanos, que l’asturianu ye la llingua del país y merez más que midíes cosmétiques”.
 
Esti nun ye l’únicu puntu del programa de Gobiernu d’Álvarez-Cascos col que Bloque por Asturies-Unidá Nacionalista Asturiana (UNA) ta en desacuerdu. Asina, la coalición considera que “les pallabres del candidatu en materia d’educación y sanidá pública escuende, tres la idea de llibre eleición de centru, la intención d’esviar fondos del sector públicu al priváu” pa llograr los oxetivos que defiende. “Meyorar la calidá de la sanidá y llograr la escelencia na educación poco o nada tien que ver con permitir a un alumnu o paciente dir a un centru públicu o concertáu, sinón garantizar los medios personales y materiales necesarios pa que lo público pueda facer la so actividá nunes condiciones bones”, apunta Huergo.
 
Pa la vocera, la llibertá d’eleición de centru, xunida a “la propuesta d’eliminación de tributos a los que más recursos tienen, como ye’l casu del impuestu de sucesiones, ponen en cuestión que s’apueste por unos servicios públicos de calidá, ya qu’esixen una financiación qu’Álvarez-Cascos en nengún momentu esplicó d’ú piensa obtenela”. Por ello, Bloque-UNA indicó que “vamos tar sollertes pa denunciar toles polítiques orientaes a reducir la inversión en sanidá y educación, que continuaría la llinia marcada pol PSOE y IX na llexislatura pasada, carauterizada polos recortes nestos sectores”.
 
Por último, no que respeuta al tema medioambiental, la postura d’Álvarez-Cascos “tamién foi decepcionante” pal Bloque-UNA. “Ye una política cortoplacista en materia de recursos como la caza y la pesca y con una sensibilidá nula a la hora de defender la nuesa biodiversidá”, apunta Huergo, que cree que FAC nun da a los parques naturales “la importancia que merecen”. D’igual forma, la vocera de la coalición echa en falta “un programa ambiciosu en materia de recuperación del territoriu, una referencia al tratu dignu a los animales y dalguna idea relevante pa los problemes de contaminación del suelu y l’aire”. Como conclusión, Huergo señala que’l programa ocultu d’Álvarez-Cascos “cada día ta más lloñe de la visión de campaña de Foro Asturias basada nuna equidistancia de la izquierda y la derecha”.