Iglesias diz a Álvarez-Cascos que “defraudó” a muncha xente pola so postura col asturianu

Nuna de les intervenciones d’esti miércoles na Xunta, Jesús Iglesias dixo a Francisco Álvarez-Cascos que “defraudó les espectatives” de muncha xente pola so postura col asturianu. El llíder de FAC nun trató’l tema nel so derechu de réplica.
 
Ente los munchos asuntos que trató’l cabezaleru d’Izquierda Xunida-Los Verdes d’Asturies, la llingua asturiana tuvo un güecu. Iglesias señaló a Álvarez-Cascos que “defraudó les espectatives” de muncha xente col tema del asturianu y fixo referencia al descontentu esistente al dar a la llingua del país “un rangu menor qu’al chinu”. Nel so derechu a réplica, acotáu a un máximu de diez minutos al ser la segunda ronda d’intervenciones, el presidente futuru d’Asturies nun trató’l tema del asturianu y dedicó’l so tiempu a tratar temes medioambientales, del AVE o a falar de l’alcaldía de Mieres.
 
Iglesias, nes sos intervenciones d’esta mañana, tamién treslladó a Álvarez-Cascos que va oponese a la reducción del sector públicu y a la privatización de la RTPA. Tamién refugó eliminar el céntimu sanitariu y calificó de “ineficaz” el cheque de 2.000 euros pa fomentar la natalidá. Mentes, Álvarez-Cascos ufrió a IX-LV una unidá d’aición conxunta frente a l’Alministración central, “sía del collor que sía”, en temes importantes como la minería, les infraestructures o’l mediu rural.