Álvarez-Cascos declara que va desarrollar la Llei d’Usu, pero pon al chinu per delantre del asturianu

Na so intervervención nel Plenu d’Investidura, Francisco Álvarez-Cascos señaló que’l so Gobiernu “va desarrollar la Llei d’Usu del Asturianu y promocionar la creación lliteraria" na nuesa llingua. Sicasí, pon al chinu per delantre del asturianu.
 
Nun discursu de dos hores, ésta foi la única referencia direuta a la llingua del país, dalgo que nun resulta una novedá porque’l desarrollu de la Llei d’Usu y Promoción del Asturianu/Bable del 1998 yera dalgo qu’incluyía Foro Asturias Ciudadano (FAC) nel so programa eleutoral. Un xestu pequeñu pal asturianu, llingua que nun va tar ente les prioridaes del Gobiernu d’Álvarez-Cascos: l’Executivu futuru asturianu va centrar los sos esfuercios na promoción del castellanu, inglés y chinu nel sistema educativu nacional. Álvarez-Cascos tamién nomó al asturianu tres estes trés llingües, anque, según dexaron entrever les sos pallabres, la so promoción va tar a un nivel inferior.
 
Otra manera, el llíder de FAC señaló na so intervención na Xunta Xeneral la so intención de baxar los impuestos, quitar el céntimu sanitariu, dar una ayuda de 2.000 euros pa fomentar la natalidá, espublizar llistes d’espera pa facilitar la llibre eleición del centru sanitariu o crear una Universidá Politéunica en Xixón con campus n’Avilés, ente otros munchos asuntos.