Más de 100 persones participaron na carrera solidaria del Monte Deva

La carrera solidaria ‘Regala un bosque’ axuntó a más de 100 persones esti domingu nel Monte Deva. D’esta forma, los organizadores recaudaron 1.600 euros pa la reforestacion d’una zona d'esti monte xixonés que quemó nel 2008.
 
L’eventu celebráu na mañana d’ayeri tuvo la compaña de la lluvia y el barru que, sicasí, nun impidieron la salida de los participantes de les dos modalidaes previstes: la ruta senderista y la carrera de montaña. El ganador d’ésta última foi’l xixonés Martín Álvarez Espinar, que destacó que’l proyeutu ‘Regala un bosque’ ye perbonu “pa concienciar a la población de la importancia de preservar les nueses viesques”. Mentes, los primeros en facer la ruta, modalidá menos competitiva que l’anterior, foron Rubén Martínez y Beatriz Fernández. Como anéudota, ente los participantes na carrera de montaña destacó la presencia d’un perru qu’acompañó al so amu, Jonathan Estraviz.
 
El proyeutu ‘Regala un bosque’ ye una iniciativa de la Fundación Deporte Mozu del Conseyu Superior de Deportes (CSD) y la Asociación Deportiva AEMAT. Amás, collabora nél la Fundación Biodiversidá, adscritu al Ministeriu de Mediu Ambiente y Medio Rural y Marín, comprometida con la preservación del patrimoniu natural y la biodiversidad. Ente los munchos deportistes qu’apadrinen esta iniciativa ta Luis Enrique, ex futbolista del Sporting y entrenador nuevu de la Roma, que firmó seis camistes pa la ocasión que los organizadores sortearon ente los participantes al final del eventu. La carrera próxima de ‘Regala un bosque’ va celebrase n’Aliaga (Teruel, Aragón) el 18 de setiembre, otra zona afeutada pol fueu.