Francisco Álvarez-Cascos va ser el presidente nuevu d’Asturies

Francisco Álvarez-Cascos va convertise, con casi toda probabilidá esti vienres, nel presidente nuevu d’Asturies. El llíder de Foro Asturias Ciudadano ye l’únicu que presentó la so candidatura a la Presidencia na Xunta Xeneral.
 
Fernando Goñi, presidente de la Cámara, confirmó esti datu pela mañana tres finalizar el plazu pa la presentación de candidatures, lo que nun dexa pie a la posibilidá de que Javier Fernández pudiera salir como presidente d’Asturies con un apoyu supuestu d’IX-LV tres nun llegar a alcuerdos FAC y PP. D’esta forma Álvarez-Cascos va ser presidente del país, por mayoría simple, na segunda votación que ta convocada pa esti vienres, yá que pa ser investíu’l miércoles ye necesaria una mayoría absoluta que nun va tener pola astención anunciada pol PP.
 
Mañana va celebrase’l debate del Plenu d’Investidura, a partir de les 12 hores, cola intervención d’Álvarez-Cascos ensin tiempu establecíu. Pal miércoles, día de la votación, a partir de les 9.30 hores, los representantes de los grupos parllamentarios van poder intervenir per espaciu máximu de 45 minutos caún, tres lo que va abrise un turnu de réplica pal presidente de FAC de media hora por intervención. Darréu, va celebrase la votación que, salvo sorpresa, va tener que repetise nun intervalu mínimu de 48 hores al nun tener Álvarez-Cascos la mayoría absoluta qu’esixe la llei.