Miguel Munarriz dexa la Delegación del Gobiernu d'Asturies en Madrid

El delegáu del Gobiernu d’Asturies en Madrid, Miguel Munarriz, unvió esti llunes una carta a los medios de comunicación pa despedise tres trés años y mediu al frente de la Delegación. El cambiu nel Executivu asturianu provoca la salida de Munarriz.
 
Munarriz destaca na carta que nel tiempu que tuvo al frente de la Delegación “punximos en marcha, xunto a un bon equipu de collaboradores, cientos d’actividaes nel ámbitu de la cultura, el turismu y la empresa”. Unes actuaciones que permitieron a la Delegación “ocupar güei un llugar destacáu ente les instituciones públiques y privaes de la capital”, amás de provocar qu’Asturies “tuviera más presencia en Madrid”.
 
Pa finalizar, Munarriz deseó que “el llabor que desendolcamos con tanto enfotu continúe meyorando”. Agora queda por saber qué papel va dar l’Executivu nuevu a les ‘embaxaes’ asturianes en Madrid y Bruxelles/Brussel. Dende la derecha criticóse nesta llexislatura’l gastu de perres que supón mantener abiertes estes dos delegaciones en tiempos de crisis.