La Coordinadora Ecoloxista y SOS Cuideiru alerten sobre los planes urbanísticos na Turbera de Las Dueñas

|

L’asociación en defensa del patrimoniu natural y cultural pixuetu, SOS Cuideiru, y la Coordinadora Ecoloxista d’Asturies alerten sobre les intenciones del Conceyu de Cuideiru de retomar los planes d’urbanización na zona del Monumentu Natural de La Turbera de Las Dueñas.

Nun comunicáu les dos organizaciones señalen que “l’alcalde de Cuideiru, non conforme cola disposición de la CUOTA, que frustró los sos planes d’autorizar a la empresa gallega ANJOCA la construcción de 850 viviendes  incluso n’altura nuna zona onde hasta’l momentu nun s’autoricen nin siquier la construcción de casetes de preseos, vuelve a la carga con una operación de prestidixitación digna de David Copperfield.”

Según denuncien “ta intentando aprebar los mesmos proyectos que desautorizó la CUOTA pola so importante afección al Monumentu Natural de La Turbera de Las Dueñas,  eso sí, con un aquel de maquillaxe” proponiendo que “s’autorice  ‘sólo’ la construcción de baxo y 2 altures, y una densidá d’edificación pa un área industrial dalgo menor. Igualmente y cara a vender meyor el proyectu menciona con una total desvergüenza la necesidá de que 50 o 60 d’eses viviendes sían de dalgún tipu de protección pública”.

Dende SOS Cuideiru y la Coordinadora afiten que l’alcalde pixuetu “intenta ‘colar’ dichos nuevos-vieyos proyectos como una modificación sustancial de les Normes de Planeamientu Urbanístiques, tando agora mesmo en plazu de presentación d’alegaciones. Sicasí, nuna amuesa inda mayor de la so gran capacidá de prestidixitación, a la vez que ta empeñáu intentando nuevamente lo anteriormente refugao, per otru llau ta saliendo en prensa reclamando y presionando pa que s’autorice a edificar l’área deportiva en zona POLA, y tres la correspondiente autorización recalificar la zona del actual campu de fútbol pa permutala a la constructora a fin de qu’edifiquen en dicho espaciu”.

Finalmente piden que “l’actual Conseyería con competencia en materia de Mediu Ambiental, nun acceda a nenguna de les pretensiones del edil, yá qu’esto supondría una escepción al estrictu Plan d’Ordenación del Llitoral, despropósitu difícilmente comprensible y así como un atentáu a la Turbera de las Dueñas, del que difícilmente podría recuperase”.

 

Comentarios

De "Paraísu Natural" a "Negociu ensin Igual". Una cosa ye la propaganda y otra les realidaes.
 

Contador Estadistiques