Los xixoneses van escoyer esti branu'l meyor chigre de la ciudá

El Teatru Xovellanos yá ta trabayando na organización de la XX Fiesta de la Sidra de Xixón, que va celebrase del 26 a 28 d’agostu. La novedá d’esti añu va ser el gallardón ‘Tienes que ir a…’, que premia al meyor chigre de la ciudá.
 
Un xuráu especializáu, que va tener trés puntos pa repartir, y otru popular, con dos puntos, compuestu por tolos ciudadanos que quieran participar, van ser los encargaos d’escoyer cuál ye’l chigre “de referencia obligada pa tomar un buen culín de sidra” en Xixón, apunten dende’l Teatru Xovellanos, entidá qu’escaeció l’usu del asturianu pa esti gallardón nuevu. Los chigreros que deseen llevase la primer edición del premiu tienen hasta’l vienres próximu pa inscribise al concursu, previo pago de 10 euros, nes oficines del Teatru Xovellanos n’horariu de 9 a 14 hores.
 
Ente toles sidreríes participantes va facese un primer corte de 10 chigres, pa depués pasar trés a la final. El ganador va dase a conocer nel día grande de la Fiesta, el domingu 28, cuando tamién va sabese cuál ye la meyor sidra del certame. Los parámetros qu’han de valorar los xuraos de cara a escoyer el meyor chigre son la hixene, l’accesibilidá, la lluz y la ventilación, tener una decoración afayadiza, un control acústicu y meses pa comer separtaes de la barra, no que se refier al establecimientu; y no que respueta a la sidra, la presencia d’echadores y el non usu de escanciadores eléctricos, un escanciáu bono, a bon ritmo, ensin chiscar, con una presentación del vasu curiosa y un bon tratu. Por última, no que correspuende a la sidra, ha de mirase qu’haya dellos palos pa escoyer, qu’éstos sían bonos y que tean una temperatura afayadiza.