Nava conviértese esta fin de selmana na capital mundial de la sidra

El XXXIV Festival de la Sidra de Nava, una de les cites más esperaes del branu, principia esti vienres. La villa naveta va vivir tres xornaes de folixa cola bébora tradicional d’Asturies como protagonista.
 
Sicasí, van ser munches les actividaes que van desarrollase estos díes en Nava, como una esposición de Francisco Ruiz Tilve titulada ‘Obra fotógrafica 1940-1970’ qu’abre güei la programación del Festival. Bolos, actuaciones musicales y gastronomía completen la ufierta del certame navetu que vive mañana’l so día grande.
 
A les 12 hores va abrise na plaza Manuel Uría la preba de sidra fecha en Nava, na que los visitantes van poder beber de baldre’l productu de los llagares Alonso, L’Argayón, Estrada, El Piloñu, Pomar, Orizón, Roza, Viuda de Angelón, Viuda de Corsina y Zapatero. Yá pela tarde, va celebrase la llectura del pregón por parte del periodista Fernando Canellada (20 hores), pa depués dar pasu a les actuaciones musicales de Los Ministros y la orquesta Clan Zero (22.30 hores), y finar la xornada a hores altes de la madrugada con DJ Nacho Otero y la presencia de ‘go-gos’. El domingo, tamién al meudía, va continuar la preba de sidra naveta de baldre.
 
Les persones de fuera de Nava que quieran disfrutar d’esta folixa tán prestosa esti sábadu van poder desplazase nos ‘Sidrotrenes’ que pon a furrular Feve pa la ocasión dende Uviéu, con salida a les 20, 21, 22 y 23.02 hores. Mentes, pa la vuelta, l’horariu de los trenes ye’l siguientes: 3, 4, 4, 5, 5, 6, 7, 7.30 y 8 hores. La compañía de vía estrecha tamién ufre salides en direición Xixón (3, 4, 5 y 7.30 hores), al traviés d’El Berrón, y Ribeseya (5.40 hores).