Indignaos impiden la espulsión d'una familia de Xixón del so pisu por tener deudes col bancu

Un grupu d’unos 30 indignaos impidió’l pasu de la Policía y el representante d’una entidá bancaria a una vivienda de Xixón onde diben a espulsar a una familia de cuatro miembros. Ye la primer vegada qu’asocede un fechu similar n’Asturies.
 
Ángel T. P., que vive nel númberu 59 de la cai Conde Toreno, nel barriu d’El Coto, xunto cola so muyer y los sos fíos, de 19 y 10 años, tenía qu’entregar güei 180.000 euros al bancu pa saldar el pagu de la hipoteca de la so vivienda. L’home pidiera un creitu de 105.000 euros que llevaba meses ensin pagar y que’l bancu, polos intereses, xubió hasta los 180.000 euros pese a que de forma recién reuniera’l dineru necesariu p’abonar les mensualidaes pendientes. Unes perres que’l bancu negóse a cobrar por aniciar yá’l procesu xudicial pa la espropiación del pisu.
 
Tres acudir esta mañana al xulgáu pa ver si saliera alantre l’aplazamientu que solicitara y nun recibir rempuesta, Ángel acudió al puestu d’información permanente que los indignaos de Xixón tienen na Plaza Mayor y éstos, gracies a la fuercia de les redes sociales, consiguieron convocar a un bon grupu de persones frente a la vivienda al meudía qu’impidió’l pasu al representante de la entidá bancaria, que foi recibíu al glayíu de ‘banqueros lladrones’. Según comunicó esta persona, la so intención yera la d’aplazar la espulsión del pisu, dalgo que tuvo que comunicar ún de los policíes a la familia. “Nun lo creo”, dixo Ángel agradecíu a los indignaos tres conseguir parar la orde d’espulsión del pisu.