Un catálogu recueye toles siendes verdes esistentes n'Asturies

La Conseyería de Mediu Ambiente colgó esti xueves na rede un catálogu en castellanu nel que se recueyen toles siendes verdes del país. En total son 115 percorríos per tola nuesa xeografía que sumen más de 1.262,4 quilómetros.
 
Esti catálogu, de 366 fueyes, inclúi 83 siendes peatonales y pa cicloturistas que permiten la realización de 115 percorríos que se dividen en diez bloques temáticos: rutes en parques naturales, pela costa, na zona de Ozcos-Eo, nos Valles Mineros, na Sienda del Osu, fluviales, periurbanes, con vistes panorámiques, accesibles y singulares. Caún d’estos percorríos vienen detallaos na publicación con una ficha descriptiva coles sos carauterístiques y llugares d’interés.Tamién se detallen les coordenaes y posibles puntos de parada y incorporen semeyes y un ortofotomapa de la ruta.
 
Según anuncien dende Mediu Ambiente, l’oxetivu d’esta publicación ye “contribuyir a poner en valor dos de los activos grandes d’Asturies como son la so biodiversidá y el so paisaxe, animando a los llectores a disfrutar d’ellos”. D’igual forma, pretenden que’l catálogu sirva pa favorecer una meyor educación medioambiental “na midida en qu’un conocimiento mayor de la nuesa tierra y de la so riqueza natural” va favorecer que se valore y cuide meyor. Ensin dulda, una ferramienta que pue ser mui útil pa los aficionaos a les rutes de cara a esti branu.