Periodistes y axentes de viaxes brasileños visitaron Asturies atrayíos pol Centru Niemeyer

Cuatro periodistes y trés axentes de viaxes brasileños tuvieron del domingu al miércoles visitando’l país. La obra d’Oscar Niemeyer n’Avilés ta teniendo muncha repercusión ente los paisanos del arquitectu de Rio de Janeiro.
 
La ruta fecha por estos profesionales taba enfocada de forma principal a conocer los equipamientos culturales asturianos, como’l Palaciu de Congresos y Esposiciones d’Uvieú y la Universidá Llaboral de Xixón, amás de, como nun podía ser d’otra forma, el Centru Niemeyer. Nestos díes tamién tuvieron tiempu pa conocer la gastronomía del país y visitar Cuideiru, Ribeseya y los Picos d’Europa, ente otros llugares.
 
Los medios de comunicación de los cuatro periodistes desplazaos a Asturies lleguen a una audiencia de más de 3 millones de persones si sumamos los medios tradicionales y los ‘on line’, polo que los atractivos nel nuesu país va servir pa llegar a una cantidá amplia de xente nel país sudamericanu. Según un estudiu de mercáu de Turespaña al que fai referencia la Conseyería de Cultura y Turismu, el perfil socio-económicu del turista brasileño que viaxa a Europa ye “altu” y na so estancia nun busca sol y playa, sinón cultura. Estes persones suelen viaxar ensin críos pela so cuenta, ensin facer usu de circuitos organizaos.
 
Les publicaciones que van sacar reportaxes sobre Asturies son Dcasa, dedicada a la decoración y el diseñu, con una tirada de 35.000 exemplares; la revista Kaza, tamién especializada na arquitectura y interiores (46.500 exemplares); el diariu O Globo, ún de los más importantes de Llatinoamérica (300.000 exemplares y 2,3 millones de suscriptores a la versión d’Internet); y la revista Istoé Platinum, sofisticada y dedicada a un públicu adineráu (105.500 exemplares). Mentes, les axencies de viaxes que se desplazaron a Asturies foron Mello Faro, especializada en congresos, eventos internacionales y viaxes corportativos y d’ociu; Improvement, axencia d’intercambiu que trabaya con estudiantes y profesores universitarios; y CP4, consultoría educacional dedicada a viaxes d’ociu.