Bloque por Asturies-UNA nun escaez la destrucción del Camín Real Sotrondio-Llabayos

El llunes asoleyóse nel BOPA l’aniciu del espediente pa la inclusión de 38 bienes arqueolóxicos de Samartín del Rei Aurelio nel Inventariu de Patrimoniu. Ente ellos ta’l Camín Real Sotrondio-Llabayos, lo que causa sorpresa nel Bloque-UNA.
 
La coalición nacionalista recuerda que, pese a la oposición vecinal y de dellos coleutivos, esti camín formigonóse nel 2004 por orde del conceyu de Samartín del Rei Aurelio, polo que tachó de “actitú esperpéntica” la decisión de la Conseyería de Cultura y Turismu d’incluyilu nel Inventariu de Patrimonio Cultural d’Asturies. “Valoramos de forma positiva l’aniciu d’esti espediente, pero nun podemos dexar de señalar, nel casu concretu d’esti camín, el despropósitu de comenzar colos trámites pa la inclusión nel Inventariu d’un elementu que se destruyó de forma grave –formigonóse tol camín y yá nun se ve l’empedráu– pol Conceyu de Samartín del Rei Aurelio nel añu 2004, cuando presentábamos les primeres denuncies ante’l propiu Consistoriu y la Conseyería de Cultura”.  Bloque por Asturies-Unidá Nacionalista Asturiana (UNA) nun escaez que dende’l Gobiernu “miróse hacia l’otru lláu, dexando pa prau les denuncies que dende entós fixímos-yos llegar, y inorando les instrucciones que’l Defensor del Pueblo daba para qu’atendieren les nueses peticiones”.
 
Col pasu del tiempo, Cultura dexó ensin sanción dalguna l’actuación municipal pese a vulnerar les Normes Subsidaries de Planteamiento del conceyu que recoyíen la proteición del Camín Real Sotrondio- Llabayos. Una situación paecía asocedió de forma reciente cola Ruta l’Alba, en Sobrescobiu, que se formigonó esti añu pese a la oposición fuerte de vecinos, formaciones polítiques y coleutivos ecoloxistes.