Un particular estroza la fonte centenaria de Tudela Agüeria cola complicidá del Conceyu d’Uviéu

La Coordinadora Ecoloxista d’Asturies denunció ante la Confederación Hidrográfica del Norte y el Gobiernu d’Asturies l’estrozu fechu na fonte de Tudela Agüeria. Un particular rellenó la fonte con escombros ante la pasividá del Conceyu d’Uviéu.
 
En concreto, la persona que fixo esta aición sorprendente ante una fonte que data del 1900 ye’l dueñu de la finca pegada a ella. Esta persona echó escombros diversos a la fonte, tamién conocida como la d’Olegario, ente los qu’hai uralites –que deben de xestionase como residuos tóxicos– y tierres. “Los rellenos nun solo destruyeron el cañu, sinón que pueden contaminar l’acuíferu que l’alimenta, colos riesgos sanitarios que pue suponer el consumu d’esti agua contamino”, alerten dende la Coordinadora.
 
El coleutivu ecoloxista señala qu’esta aición desarrollóse cola complicidá del Conceyu d’Uviéu que, “a pesar de ser conocedor d’estos fechos graves, nun atendió les denuncies de los vecinos de la zona y permitió al particular conocíu a esti delitu ambiental”. Los miembros de la Coordinadora entienden que l’actitú d’esti particular pue ser “constitutiva d’infracción a la Llei d’Agües al ser la fonte un bien d’interés público que prevalez sobre’l restu de rangos de propiedá”.