Manuel Busto, embaxador de la sidra DOP nel añu 2011

El pentacampeón del Mundo de piragüismu, Manuel Busto, ye dende esti martes Embaxador de la Sidra d’Asturies 2011. El Conseyu Regulador de la DOP fixo asina un homenaxe al palista maliayu.
 
Busto recibió esti reconocimientu mientres l'actu de presentación de la collecha del 2010, onde lu recibieron a la so salida simbólica del tonel nel qu’aguardaba'l so nomamientu. Dende’l Conseyu Regulador argumentaron la decisión de dar esti títulu honoríficu al maliayu destacando’l so “exemplu d'esfuerzu” y el "reflexu que supón pa los mozos”.
 
Nel actu que tuvo llugar nel Palaciu de Congresos d’Uviéu pa presentar la collecha 2010 de la sidra de Denominación d’Orixe Protexida (DOP), Eloy Cortina, presidente del Conseyu Regulador, señaló que le meta pa esti añu ye’l de Superar les cifres de venta de sidra al esterior, que nestos momentos tán nun 5 por cientu del productu. Nun somos tan pocos –ellaboradores–”, señaló, entrugáu sobre la posible necesidá d'aumentar el númberu de productores integraos nel Conseyu. “Somos 25 llagareros –nesti momentu incorporáronse dos más– y van aumentando ún o dos cada añu, pero la preocupación que tenemos ye la venta al esterior; ésa y tener mazana y calidá abondo”, matizó, ensin establecer una meta concreta en cuestión de porcentaxes, pues “el nuesu oxetivu nun ye crecer por crecer, sinón crecer con calidá”. Sicasí, la xerencia del Conseyu confía en qu'unos 12 llagareros más ingresen nun futurupróximu na llista d'incorporaos.
 
Esti añu, la producción de la DOP foi de 1.043.747 llitros de sidra, y utilizáronse 1.389.703 quilogramos de mazana de les plantaciones integraes. Les hectárees utilizaes crecieron de les 530 a les 571 y los collecheros de mazana inscritos son 263. Pel momentu, los datos baraxaos hasta agora pol Conseyu muestren un incrementu de les ventes de botelles mientres el primer semestre del 2011, un 11 por cientu superior al del 2010. Al marxe de la DOP, la producción de sidra, tanto natural como d'otros tipos, rondaría los 45 millones de llitros na última collecha, según estimaciones del conseyeru de Mediu Rural en funciones, Aurelio Martín, tamién presente nel actu xunto con Reyes Ceñal, xerente del Conseyu Regulador, que destacó“l'estáu óptimu” nel que s'embotelló la sidra de la collecha 2010. “Nesti momentu”, esplicó, “toles sidres tán en condiciones escelentes pa prebar”.
 
Na cita celebrada güei n’Uviéu, el Conseyu Regulador entregó delles distinciones: Sidra Espumoso Institucional 2011 a Valle Ballina y Fernández; Sidra Natural de Nueva Espresión institucional 2011, a Españar; Sidra Natural Tradicional Institucional 2011, El Santu; y Productor de Mazana de la DOP 2011, a José María Díaz González.