L’Institutu Asturianu d’Estadística espubliza l’Anuariu del 2009

Esti martes espublizóse l’Anuariu Estadísticu d’Asturies 2009, una gama amplia de tables y gráficos que proporciona una radiografía precisa del país. Nél pueden consultase datos demográficos, económicos, sociales o culturales d'esi añu.
 
“L’Anuariu Estadísticu d’Asturies 2009 ye una recopilación de les estadístiques referíes a Asturies y los sos conceyos na que se sintetiza información espublizada por organismos públicos y privados, como l’INE, ministerios, conseyeríes y otres instituciones públiques, entidaes privaes, etc.”, esplique dende l’Institutu Asturianu d’Estadística (IAE). Asina, los sos autores dividen l’Anuariu en trés grandes bloques. El primer d’ello dedícase a recoyer una serie d’indicadores que permiten comparar el nuesu país con otros territorios europeos. Mentes, na segunda parte, recuéyese la información estadística referida al ámbitu nacional separtada de manera temática en 19 apartaos que, al empar, dixébrense en delles seiciones. Por último, l’Anuariu céntrase nos indicadores municipales más relevantes de los 78 conceyos asturianos.
 
La importancia d’esti Anuariu ta en que muestra datos que son complicaos d’atopar de manera habitual. Asina, les persones que faigan usu del documentu van poder conocer datos sobre playes, ríos, llagos, parques, reserves naturales y paisaxes protexíos, parque de vehículos, rede de carreteres y intensidá media diaria de circulación de vehículos nella, tesis doctorales que se lleeron na Universidá d’Uviéu, encuestes de satisfaición de pacientes, evolución de las llistes d’espera quirúrxica, recursos y servicios d’atención social, equipamientos culturales y deportivos, evolución del número de visitantes a museos o númberu de socios de la rede de biblioteques públiques, ente otros. Los trabayos estadísticos necesarios pa la ellaboración del Anuariu fíxolos la Sociedá Asturiana d’Estudios Económicos y Industriales (SADEI) mediante una encomienda de xestión del IAE.