El proyeutu políticu ecoloxista Equo preséntase esti martes n’Asturies

Xixón va acoyer esti martes la presentación n’Asturies d’Equo, proyeutu políticu ecoloxista en construcción que quier consolidase de cara a les xenerales del añu qu'entra. Va ser nel Centru Municipal de L’Arena a partir de les 19 hores.
 
Inés Prada, Nacho González y Juantxo López de Uralde van ser les persones encargaes d’esplicar los detalles d’esta iniciativa que va facese realidá na seronda cola celebración d’un conceyu constituyente al que tán convidaes toles persones que quieran sumase a esti “movimientu políticu y social pa la creación d’un proyeutu políticu que tenga como pilares básicos la ecoloxía, la igualdá social, la defensa de los Derechos Humanos y la democracia”, aseguren dende Equo. La intención de les persones qu’encabecen el proyeutu ye la d’entamar una estructura federal na que cada persona va tener un votu: “Dotarémonos d’una estructura provisional, horizontal, participativa, en rede, hasta l’asamblea constituyente y el congresu que faigan la definitiva”, añaden.
 
La marca Equo ye un regalu del poeta Fernando Beltrán a esti proyeutu. “Nun son sigles, sinón una pallabra que fai referencia a los dos pilares básicos de Equo: ecoloxía y ‘equidad’”, espliquen.