El II Mediu Güeyu Festival recibió 150 cintes pal concursu de curtios

Ente’l 30 de setiembre y el 2 d’ochobre va celebrase nel maliayu Teatru Riera la segunda edición del Mediu Güeyu Festival, certame dedicáu a los curtios. Nesta ocasión, la organización recibió 150 cintes pa participar nel concursu.
 
L’Asociación Cultural Mediu Güeyu, impulsora d’esti festival que tien como oxetivu dinamizar la vida cultural de Villaviciosa, va escoyer mediu centenar de cintes que van entregase al xuráu y participar de manera definitiva nesti concursu. Una cifra mui alta que consolida esta iniciativa nel so segundu añu de vida. De los 150 curtios unviaos, venti tienen firma asturiana y trés d’ellos, maliaya.
 
La organización del Festival convidó pa estes tres xornaes dedicaes a los curtios a Penelope Price contaremos con la presencia de Penelope Price, documentalista norteamericana que va presentar per primer vegada n’Europa el so trabayu nuevu, que lleva’l nome de ‘Afganistán: ente la lluz y la escuridá”. Otra cinta mui esperada va ser ‘Tudancos’, una reflexón del mundu del campu o a partir d’esta raza bovina cántabra obra de Rodolfo y Nano Montero. Na presentación del Mediu Güeyu, que tovía ta zarrando’l so programa definitivu, tuvo presente Gonzalo Tapia, cineasta avilesín que collabora col Festival, al igual que la Fundación José Cardín Fernández, que cede les sos instalaciones pa la proyeición de delles cintes.