Andecha quier que los puertos de Xixón y Avilés dexen de ser del Estáu

La organización nacionalista Andecha Astur solicita al traviés d’una nota de prensa que los puertos de Xixón y Avilés dexen de ser propiedá del Estáu y pasen “a titularidá asturiana”. Dende Andecha acusen a les autoridaes españoles “de llevalos a la ruina col oxetu de beneficiar los intereses gallegos”.

Andecha denuncia “la situación d’abandonu nel que s’alcuentren los puertos de Xixón y Avilés, dambos baxo titularidá española”, dalgo que “vien siendo reiteradamente denunciao pol conxuntu del seutor pesqueru asturianu” polo qu’urxe a que dambos puertos “pasen a titularidá asturiana (son los únicos asturianos baxo dependencia española), darréu qu’atalanta que non solo ye de sentíu común qu’el conxuntu los puertos d’Asturies tean baxo control asturianu, sinón porque considera que la dexadez que carecen (recientemente LonjaGijón pidió simplemente’l mesmu tratu qu’otres rules pa poder competir con equidá) nun ye circustancial, como tampoco nun lo ye l’especial «celu inspector» que sufren, con decomisaciones y sanciones a compradores y el consiguiente efectu disuasoriu pa los barcos; sinon que respuende al interés estatal de desarticular el sector pesqueru asturianu en beneficiu del gallegu”.

Dende Andecha conseñen “nun ye coincidencia’l fechu de que’l PSOE gallegu gobierne en coalición col BNG, nin el fechu ciertu de que mentes en Galicia esiste un gobiernu propiu, con competencies y voluntá política, n’Asturies carecemos un gobiernu sucursal que malpenes pasa de ser una mera descentralización alministrativa ensin competencies d’interés”.