La XV Fiesta de la Oficialidá de la Llingua Asturiana de Bimenes llega al so día grande

Esti sábadu ye’l día grande de la XV Fiesta de la Oficialidá de la Llingua Asturiana de Bimenes. Enantes, el vienres, va entregase’l premiu del XIV Concursu de Cuentos pola Oficialidá al so ganador, Nacho Fonseca.
 
La cita d’esta tarde va principiar a les 19.30 hores na Casa Cultura de Santuyano. Nacho Fonseca va recoyer el so premiu, dotáu con 800 euros, y va lleer la obra ganadora, ‘Lluis’. Tamién van tar presentes pa recibir el so gallardón Quique Faes Díaz, segundu clasificáu con ‘Tengo un plan’, y Pablo Rodríguez Alonso, terceru con ‘¿Qué coño bebe un zulú?’. Tres esti actu, alredor de les 20.30 hores, Ludivino Díaz González, ‘Pin de la Cotolla’, va facer rir a los presentes col so espectáculu ‘Cotollaes’.
 
Mañana, día grande d’esta fiesta que tien orixe na declaración de la oficialidá nel conceyu nun Plenu celebráu’l 4 de xunetu del 1997 –torgada depués pol Tribunal Constitucional–, l’actividá va principiar cola yá tradicional llectural del pregón, qu’esti añu va protagonizar l’escritor, dramaturgu y xestor cultural, Adolfo Camilo Díaz. Va ser a les 12.30 hores na Casa Conceyu, en Martimporra.
 
Tres esti primer actu, va celebrase una misa n’asturianu oficiada por José Manuel García deJesús y cantada por El Corriellu la Pandorga, a la que va siguir, a les 13.30 hores, les actuaciones del Ensame de Música Tradicional y del Grupu de Baille de Los Yerbatos. Pela tarde, l’activá va pasar a Santuyano col arranque, a les 18 hores, del XII Concursu de Gaiteros y Gaiteres Mozos. Dos hores más tarde va actuar el grupu folk Na que contate y, a les 21 hores, van entregase los premios del concursu de gaiteros.
 
Como novedá d’esta decimoquinta edición de la Fiesta de la Oficialidá de Bimenes ta la participación d’hosteleros llocales na folixa del sábadu al traviés d’una xornada gastronómica. Asina, l’Asador Noval, el Bar El Llugar, el Mesón San Cipriano y l’Hotel El Boreal van ufrir a yerbatos y visitantes un menú especial con platos del país.