El COFPA esixe a la Xunta una investigación de los procesos de seleición na sanidá asturiana

El Conceyu por Otra Función Pública n’Asturies (COFPA) esixe a la Xunta Xeneral una investigación de los procesos de seleición y tresllaos del personal na sanidá asturiana. Nes selmanes últimes conociéronse delles iregularidaes.
 
La primer d’elles, según informa’l COFPA, foi la filtración d’un casu práuticu del concursu-oposición de la especialidá de rehabilitación por parte d’ún de los miembros del Tribunal que llevó a paralizar la convocatoria. A los pocos díes, dellos aspirantes a les places de la especialidá de medicina interna denunciaron la esistencia d’intereses personales en, polo menos, ún de los miembros del Tribunal, lo que que contaminaba la oxetividá del procesu seleutivu. A lo último, y pel momentu, un grupu d'opositores de la especialidá de medicina intensiva recurrió’l procedimientu seleutivu pola esistencia de filtraciones de delles entrugues a dellos aspirantes.
 
La cosa nun queda equí, porque enantes d’estes denuncies, tamién hubo reclamaciones por irregularidaes nel procesu de tresllaos amestáu a la Ufierta Pública d'Empléu (OPE). Asina, por casu, na especialidá de farmacia hospitalaria, dos de les trés places que quedaron vacantes nos tresllaos xudicializáronse por irregularidaes, tando yá resueltu ún de los procesos xudiciales a favor de la demandante –l'otru entá ta pendiente de xuiciu–, “lo que supunxo un gastu estra a l'Alministración asturiana pa compensar económicamente la diferencia de sueldu a la persona que tendría qu'ocupar el puestu pol añu que duró'l trámite xudicial , mientres foi desempeñáu por otra persona ensin mediar convocatoria pública”, aseguren dende’l coleutivu. “Pa rematar esti caos, l’Alministración autonómica anunció la suspensión de les convocatories del restu d'especialidaes, decisión qu'afeuta a Medicina de Familia y 14 especialidaes más, calteniendo la situación d'inestabilidá ya incertidume na que s'atopen los profesionales de la sanidá”, añaden.
 
El COFPA considera que toda esta montonera de denuncies “nun pue ser casual” y provoca “una impresión alarmante de falta d’imparcialidá de los órganos de seleición nos procedimientos d’accesu a la sanidá pública asturiana que pon en tela de xuiciu non yá solo’l derechu fundamental de los opositores a aportar a los puestos de trabayu del SESPA en condiciones d´igualdá, sinón tamién la garantía de la calidá del serviciu sanitariu asturianu, que se vería estropeada si s´escueye a enchufaos con influencies y non a los profesionales con más méritos y capacidaes”. Por ello, encamienta a l’Alministración a siguir la primer midida del documentu con 30 puntos pa la so rexeneración ellaboráu por esti coleutivu que fai referencia a que los miembros de los tribunales han d’escoyese por sortéu pa garantizar “la independencia de los órganos de seleición del poder políticu, anguaño n’entredichu al acutar la designación discrecional de la totalidá de los sos integrantes, cola posibilidá d’incluyir al personal de llibre designación –ensin llimitación dalguna–”.
 
“La midida propuesta y otres complementaries son decisiones urxentes y imprescindibles pa garantizar la llimpieza y tresparencia de los procesos d'accesu al emplegu públicu n'Asturies, a la vista de les graves y repitíes denuncies sobre’l funcionamientu de los tribunales que xulguen les pruebes d’accesu a les places del SESPA”, añaden dende’l Conceyu, que solicita a los poderes públicos “poner en marcha un procesu d'investigación independiente que, más allá d'esaminar les irregularidaes cometíes nes pruebes concretes denunciaes, analice’l funcionamientu actual de los procedimientos d’accesu al emplegu públicu n'Asturies –sistemes de nomamientu de los tribunales, garantíes d'anonimatu de les pruebes seleutives, reclamación y defensa de los aspirantes, etc – y impulse los cambios normativos y de xestión necesarios”. Por ello, el COFPA va treslladar a la Xunta Xeneral les sos reclamaciones.