Una marcha d’indignaos sal d’Asturies con destín a Madrid

Asturies va sumase a la Marcha Popular Indignada que tien como meta Madrid el 23 de xunetu. Indignaos del tol Estáu van salir dende les sos poblaciones p’axuntase na capital castellana y participar nuna concentración de protesta.
 
Una decena d’indignaos de Xixón salieron ayeri a les 7 hores de la Plaza Mayor pa facer la primer etapa que tenía final en Noreña, onde taba previsto un actu reivindicativu en solidaridá colos ciudadanos griegos. Güei tienen previsto sumar xente na villa condal pa siguir camín en direición a Sama y axuntase mañana con tola espedición asturiana en Mieres. Esta ciudá de la cuenca’l Caudal va ser el puntu de salida oficial de la marcha d’indignaos asturianos el sábadu.
 
Pela so parte, los indignaos d’Avilés van salir güei a les 8 hores de la plaza de la Casa Conceyu pa tomar direición hacia Llugo, onde facer un parón enantes de continuar mañana hacia Soto Ribera y llegar el sábadu a Mieres. Mentes, los uviedinos van salir el vienres direutos hasta’l puntu de partida de la marcha. Les paraes previstes nos díes próximos son Campumanes, Arbas del Puertu o Brañilín, Villamanín, La Robla y Lleón. En Benavente, oxetivu principal siguiente de los indignaos nesta ruta, van axuntase colos procedentes de Galicia.
 
En toles poblaciones, los indignaos van celebrar asamblees pa recoyer “les inquietúes, les reivindicaciones, les esperiencies y les luches de tolos pueblos”, apunten dende’l coleutivu d’indignaos. Éstes van recopilase pa facer un llibru, estableciendo “un diálogu ente les acampaes, ciudades, pueblos y barrios, encamináu hacia la construcción d’un mundu más xustu que construyamos ente toos y toes”.
 
Estos díes tán saliendo dende delles ciudades marches con direición a Madrid. Santiago de Compostela, Cádiz, Murcia, Valencia, A Coruña, Barcelona, Logroño, Málaga y Granada son dalgunes de les poblaciones que tienen programada una marcha igual que l’asturiana. Les persones que participen na marcha con salida n’Asturies van informar del so viaxe de protesta hacia Madrid en Twitter y Facebook gracies a dispositivos móviles.