El Plenu d’Investidura va celebrase’l martes 12 de xunetu

El 12 de xunetu ye la fecha escoyida pola Xunta de Voceros aconceyada esti llunes na Xunta Xeneral pa celebrar el Plenu d’Investidura. Un día depués, Asturies podría tener presidente nuevu si dalgún candidatu algama la mayoría absoluta.
 
Nel casu de que nengún de les persones que se presenten a la votación consiga esa mayoría absoluta, el día 15 sería’l día nel qu’Asturies conocería’l so presidente. Según consta nel reglamentu de la Xunta Xeneral, cualquier candidatu qu’opte a presidir el país tien de proponelo ante la Mesa de la Cámara con una antelación de 24 hores a la celebración de la sesión, esto ye, el día 11 de xunetu, teniendo al menos el respaldu de cinco miembros del Parllamentu.
 
La sesión del día 12 va principiar cola llectura, por uno de los secretarios, de los candidatos propuestos. Darréu, éstos, siguiendo l’orde de presentación de les candidatures, van esponer les llinies xenerales del programa del Gobiernu que pretenden formar. Tres les intervenciones, va suspendese la sesión per 24 hores, reanudándose cola intervención d’un representante por caún de los grupos parllamentarios, con un máximu de 45 minutos por persona. Los candidatos van poder retrucar a los voceros de cada grupu que, al mesmu tiempu, van tener derechu a réplica. Tres una intervención última de los candidatos, va zarrase la sesión pa, un tiempu depués, esi mesmu día, tornar a abrila y facer la votación.
 
Nel casu de nun haber una mayoría absoluta’l 13 de xunetu, la votación va repetise’l día 15. Nesa ocasión, va valer una mayoría simple pa investir al presidente d’Asturies próximu.