Un equipu de la televisión pública belga ta grabando un reportaxe sobre Asturies pa un espaciu turísticu

‘Vlaanderen Vakantieland’, espaciu turísticu selmanal en flamencu de la televisión pública belga, va emitir un reportaxe sobre Asturies. Un equipu de la cadena ta dende’l domingu trabayando nel nuesu país pa la ellaboración del programa.
 
La zona de Picos d’Europa, pa conocer la ellaboración del quesu Cabrales y el Gamonéu, y averase a Cangues d’Onís y Cuadonga; y Uviéu, pa tratar la vinculación del cineasta Woody Allen cola ciudá y visitar los escenarios onde l’estauxunidense grabó ‘Vicky, Cristina y Barcelona’, amás de Gascona y el cascu vieyu, son los dos puntos d’Asturies escoyíos nesta emisión polos responsables del programa más antiguu de la televisión pública belga. ‘Vlaanderen Vakantieland’ tien una audiencia de 400.000 a 600.000 espectadores (sobre una población de 10 millones) y emítese hasta en tres ocasiones por redifusión. Amás, trátase d’un programa que tamién pue vese n’Holanda, polo que tamién públicu d’esti estáu va conocer dalgunes de les munches coses que pue ufrir Asturies al turista de la Europa noroccidental.
 
Bélxica, con una colonia importante d’emigrantes asturianos, ye xunto a Luxemburgu y Holanda, el quintu mercáu emisor de turistes a Asturies si miramos el númberu de pernoctaciones. Nel 2010, hubo 42.000 de persones procedentes d’estos tres estaos.