Corquiéu va actuar na playa La Espasa y Xixón va vivir delles actuaciones de grupos folclóricos

Cola llegada del branu l’actividá musical multiplícase enforma n’Asturies. Esta fin de selmana destaca’l conciertu de Corquiéu en Caravia y l’actuación de dellos grupos folclóricos en Xixón nes fiestes de San Xuan y San Pedru.
 
La de Corquiéu ye una de les cuatro actuaciones previstes na yá tradicional folixa de San Xuan de Caravia, na playa La Espesa. Los riosellanos van poner el toque folk de la folixa tres el prendíu de la foguera nun añu perbono pa la banda, puesto que foron los grandes triunfadores de los Premios AMAS –xunto con Avalanch– al llevase dos galardones: al meyor discu folk pol so tercer álbum ‘Suaña’ y al meyor cantar folk pol tema ‘Bratislava’. Amás de Corquiéu, van tocar nesta fiesta qu’atrae a esta sablera de Caravia a un númberu impresionante de xente Mala Reputación, Desakato y Almatrampa.
 
Mentes, en Xixón, ciudá que ta viviendo les fiesta de San Xuan y San Pedru, esta fin de selmana va haber delles actuaciones de grupos folclóriquos. Asina, esta tarde, a les 20 hores, l’Agrupación Folclórica Asturiana Los Xustos va tar plaza l’Institutu, más conocida como’l Parchís, y el Grupu Folclóricu Xolgoriu, na plaza d’Italia. El sábadu, el turnu va ser pa La Alegría, que va baillar nos Xardinos de la Reina al meudía. Yá pal domingu, Los Collacios van tar nel Centru Municipal Integráu Atenéu La Calzada, a les 13 hores; Excelsior Música y Baille Tradicional, nel Parchís, a les 18 hores; y Xiringüelu, na plaza d’Italia, a les 19 hores. Mentes, dientro de les fiestes de San Pedru de Pumarín, va actuar al meudía Flor de Xaranzaina.
 
Otres actuaciones destacaes d’esta fin de selmana son la de Vetusta Morla, Xoel López y Eladio y los Seres Queridos (20 hores, Niemeyer) y Black Horde (22 hores, La Antigua Estación), el vienres; y los de Miguel Álvarez (21 horas, Acapulco) Francisco Nixon y Pingüino (22 hores, La Antigua Estación) y Shanti (22 hores, Niemeyer), el sábadu.