El Pueblu d’Asturies acueye la Romería de San Pedru

El día 29 ye San Pedru, patronu de Xixón, y los xixoneses van celebralo nel Muséu del Pueblu d’Asturies con una romería na que destaca la presencia de Tuenda. La cita adelántase a esti sábadu pa que tolos asturianos puedan disfrutar d’ella.
 
L’oxetivu d’esta iniciativa ye recuperar l’ambiente festivu de les romeríes tradicionales. Asina, los asistentes van poder baillar la danza prima, disfrutar d’actuaciones musicales, comer una empanada o beber sidra nel chigre que va instalase nel Pueblu d’Asturies, ente otres munches coses. L’actividá de la Romería de San Pedru va principiar a les 11.30 hores con un pasucais de la Banda Gaites Llacín, pa depués celebrar al meudía una misa con gaita na que participa Belén Arboleya acompañada de la voz Mari Luz Cristóbal. Enantes de la hora de la xinta, a les 13.30 ta previsto la puya’l ramu y un pericote.
 
Pela tarde, a partir de les 17 hores, los neños y neñes van poder disfrutar cola práutica de deportes tradicionales y, una hora más tarde, de la representación de la obra de teatru de guiñoles ‘Patayuyu’ a cargo de Bailadera. Mentes, pa les 18.45, los pas van poder tomar parte nel taller y concursu de baille tradicional y, a les 21 hores, presenciar un conciertu de Tuenda, tres el que va quemase una foguera y los presentes van baillar una danza prima. 
 
Nesta ocasión, na organización de la IV Romería Tradicional de San Pedru participen, amás del Muséu del Pueblu d’Asturies y la conceyalía antigua de Cooperación, Cultura Tradicional y Política Llingüística, l’Asociación Cultural Llacín de Porrúa. La entrada a la instalación ye de baldre.