El candidatu de Bildu, diputáu xeneral de Gipuzkoa

El periodista Martin Garitano, candidatu de Bildu, ye’l diputáu xeneral nuevu de Gipuzkoa. D’esta forma, la coalición llogra la mayor cuota de poder de la izquierda abertzale na historia de la democracia.
 
Garitano resultó escoyíu na segunda vuelta colos votos de los 22 xunteros de Bildu y el de la rexidora d'Aralar, Rebeka Ubera, dao que na primera requierse mayoría absoluta. Los xunteros del restu de grupos políticos –PNV (14), PSE (10) y PP (4)– apoyaron a los sos candidatos, Markel Olano, Rafaela Romero y Juan Carlos Cano, de manera respeutiva.
 
La sesión d’investidura principió a les 9 hores, y tres un recesu de 120 minutos, prollongóse mientres tola tarde cuando, depués del debate de tolos grupos, tuvieron llugar les votaciones al cargu de los 51 xunteros que componen la Cámara foral. La presidenta del Parllamentu foral guipuzcoanu, Lohitzune Txarola, procedió a proclamar al diputáu xeneral nuevu al toque del himnu de Gipuzkoa y fixo-y entrega del cayáu de mandu a Garitano, que dende güei va ser el nuevu primer mandatariu del territoriu históricu.
 
Tres la investidura, Garitano dio un pequeñu discursu centráu de manera principal en dar les gracies a les persones que-y votaron y a los que non “por garantizar la pluralidá”, y tamién a los que tovía viven “una situación non llegal”. “La so ansia de democracia tien que ser un exemplu pa toos”, añadió. Tamién tuvo pallabres pa los sos pas y terminó animando a los sos compañeros de coalición a trabayar duro.
 
Mentes, nel so discursu enantes de les votaciones de la Cámara foral, comprometióse a trabayar pa “superar el conflictu políticu” y emplazó a ETA y al Gobiernu estatal al “diálogu” pa poner final a la violencia. Tamién apostó por “facer frente al sufrimientu de les víctimes”, incluyíos los presos de la banda.