Amnistía Internacional pide al Gobiernu que respete 10 puntos mínimos sobre los derechos humanos

Ante'l debate d’investidura del que va salir el presidente d’Asturies, Amnistía Internacional (AI) solicita al Executivu nuevu que respete 10 puntos mínimos sobre los derechos humanos. La ONG tamién quier implicar a los conceyos.
 
“Cuando l’Estáu nun respeta los derechos humanos, les alministraciones autonómiques y llocales son los interlocutores primeros de quienes busquen proteición y xusticia. Polo tanto, estes alministraciones son fundamentales pa la proteición d’estos derechos”, señaló Francisco Javier Fernández, presidente d’Amnistía Internacional Asturies. Fernández fixo especial referencia a los ámbitos de la sanidá, la xusticia y la educación, nos que les alministraciones autonómiques tienen competencies definíes.
 
Los diez compromisos mínimos a los que fai referencia (AI), y que tán incluyidos na Axenda de Derechos Humanos pa Comunidades Autónomes y Ayuntamientos qu’espublizó esti martes, son los siguientes: lluchar contra el racismu y la discriminación, incluyendo la xenofobia y la islamofobia; contra la violencia de xéneru en toles manifestaciones, incluyida la violencia sexual y la trata; asegurar la formación de policíes llocales en materia de derechos humanos; tomar midíes pa que se respeten los derechos de los menores d’edá en centros d’acoyida; garantizar el derechu de los menores tutelaos pola Alministración a la educación, salú y integridá física y mental; desarrollar polítiques, lleis y midíes orientaes a garantizar los derechos económicos, sociales y culturales de toles persones; impulsar la educación en derechos humanos; garantizar nes sos rellaciones con autoridaes d’otros estaos la promoción y respetu de los derechos humanos; promover iniciatives a favor de los derechos humanos al traviés de declaraciones institucionales o mociones; esixir y establecer midíes p’asegurar que l’ayuda al desarrollu tea orientada a la proteición efeutiva de los derechos humanos.
 
Otra manera, na so intervención cola prensa, Fernández espresó la so preocupación pola proliferación de denuncies contra la identificación d’inmigrantes y les redaes por parte d’axentes de la Policía, “pola so apareciencia étnica o racial”. “Lo lóxico ye que se faigan cuando se cometiera un delitu o haya una situación contraria a la llei, pero non pa identificar a inmigrantes irregulares”, añadió. Per otru llau, el presidente nacional d’AI destacó la meyora de la Cooperación al Desarrollu n’Asturies nos años últimos, una cartera xestionada nes dos llexislatures últimes pol Bloque por Asturies y por Izquierda Xunida. Al respeuto, señaló nun tener mui claro si’l cambiu de Gobiernu vaya a influyir na xestión d’esti aspeutu, pero alertó de que “la mayoría de los partíos que se presentaron –a las eleiciones– nun contemplaben cuestiones rellacionaes con cooperación al desarrollu”. Sicasí, la mayoría si incluyíen “el compromiso del 0,7 por cientu, por exemplu Foro Asturias”, apuntó.