Educación duplica’l presupuestu de les ayudes complementaries pa estudiantes Erasmus

El presupuestu d’ayudes complementaries pa estudiantes Erasmus asturianos va pasar de 100.000 a 200.000 euros pal cursu próximu. L’aportación que la Conseyería d’Educación y Ciencia da a cada alumnu ye de 200 euros al mes.
 
Estes ayudes busquen “potenciar la internacionalización y la movilidá de los estudiantes universitarios asturianos por tolos beneficios que comporta la estancia n’otres instituciones académicas europees, una esperiencia que favorez un conocimiento mayor d’otres llingües, xenera opciones d’emplegu nueves y aumenta la capacidá d’adaptación a sistemes educativos diferentes”, apunten dende la conseyería. Con elles, tamién traten de compensar l’esfuerzu económicu que supón el desplazamientu pal alumnáu con menor nivel de renta, que pue llegar a recibir un máximu de 1.800 euros per cursu.
 
La convocatoria pa solicitar esta beca principia güei, tres la espublización ayeri de les bases de la mesma ayeri nel Boletín Oficial del Principáu d’Asturies (BOPA), y los interesaos tienen hasta’l 25 de xunetu pa presentar la documentación necesaria. Pueden aspirar a estes ayudes los estudiantes Erasmus de la Universidá d’Uviéu, del centru asociáu de la Universidad Nacional de Educación a Distancia (UNED) n’Asturies y de los centros qu’imparten enseñances artístiques superiores nel país.