El Gobiernu aprueba la supresión de los segundos ciclos d’Informática, Xeoloxía y Ciencies del Trabayu

El Conseyu de Gobiernu d’esti miércoles decidió la supresión de les enseñances de segundu ciclu d’Inxenieru Informáticu, Inxenieru Xeólogu y Ciencies del Trabayu. D’esta forma traten d’adaptar los estudios universitarios al ‘Plan Boloña’.
                                                              
La supresión de les enseñances de segundu ciclu d’estes titulaciones va tener llugar nel cursu académicu 2012-2013, nel que yá nun van ufiertase places de primer cursu de los dos que conformen el ciclu. L’Executivu trata con ello que tol alumnáu pueda conocer un año enantes qu’estas enseñances nun va continuar ente les qu’ufre la Universidá d’Uviéu. Les titulaciones de segundu ciclu procedentes de la regulación anterior que s’imparten anguaño na institución tresformáronse n’enseñances de Grau o Máster.
 
El Gobiernu aprobó güei tamién el Decretu de supresión d’enseñances de Másteres Universitarios na Universidá pal cursu 2011-2012. Ello ye consecuencia de la reorganización d’esti tipu d’enseñances qu’entamó la institución académica nel marcu del proyeutu del Campus d’Escelencia Internacional (CEI). Nel cursu pasáu, la Universidá puso en marcha una convocatoria pa seleicionar másteres nuevos que respondiesen a criterios d’internacionalización, de collaboración con otres universidaes y empreses, nos que los conteníos axústense a una formación de carauter profesional.