La Tertulia Pachín de Melás va aldericar sobre la reforma posible de la llei eleutoral

Esti martes, a les 20 hores, torna l’actividá de la Tertulia Pachín de Melás, alderique entamáu por Unidá Nacionalista Asturiana (UNA) en Xixón. Nesta ocasión el tema de debate ye la llei eleutoral y la so reforma posible.
 
En concreto, el títulu de tertulia de güei ye ‘Llei eleutoral: modelos y posibilidaes de reforma’. Pa tratar esti tema, la formación nacionalista convidó a Faustino Zapico, historiador y analista políticu; Daniel Ripa, investigador del departamentu de Psicoloxía de la Universidá d’Uviéu y partipante na acampada d’indignaos d’Uviéu; y Miguel Presno, profesor universitariu de Derechu Constitucional. Estes trés persones van debatir, xunto a los presentes, “sobre les deficiencies y posibilidaes de reforma que presenta esta llei”, señalen dende UNA.
 
L’alderique va principiar a les 20 hores nel Bar Cantábrico, como ye vezu. Ésti establecimientu hosteleru asitiase na cai Muelle d’Oriente númberu 3, cerca de los Xardinos de la Reina.