La primer xornada de la fuelga del metal provocó un parón total nel sector

El bloquéu na negociación del conveniu del metal llevó güei a la fuelga a más de 20.000 trabayadores de les 1.250 empreses del sector. Los sindicatos afirmaron que’l siguimientu del paru foi total, mentes que Femetal cifrólu nun 25 por cientu.
 
MCA-UXT Asturies y la Federación d’Industria de CC OO aseguraron que’l paru apoyóse de manera unánime en tol país, tanto n’empreses medianes y pequeñes como naquelles con un volume de plantiya y negociu superior. “Los trabayadores respaldaron asina’l llamamientu de les organizaciones sindicales, al entender que les propuestes de la patronal asturiana del metal tán fuera de toda lóxica y son regresives tanto dende’l puntu de vista económicu como d’estructura de conveniu”, apuntaron dende los sindicatos.
 
Por contra, la patronal reduz el 100 por cientu que señalaron les centrales por “un 20 o 25 por cientu”, en pallabres d’Álvaro Alonso Ordás, secretariu xeneral de Femetal. Na so opinión, la fuelga “foi un fracasu auténticu”. “La mayor parte de los trabayadores que faltaron al trabayu pidieron vacaciones, cambiaron el día de trabayu o solicitaron díes compensatorios pa evitar males mayores”, añadió.
 
Alonso tamién faló d’actos de vandalismu en dalgunos polígonos industriales y empreses concretas, mentes que los sindicatos aseguraron que la primer xornada de partu trescurrió con tranquilidá y ensin incidentes.