El plazu máximu d’entrega d’una gaita asturiana baxa hasta l’añu

Los talleres artesanos que se dediquen a la ellaboración de gaita asturiana nun se llibren de la crisis. El plazu máximu d’entrega d’esti instrumentu baxó hasta l’añu, mentes que el mínimu ta ente la entrega inmediata y los 15 díes.
 
Esta situación, a la que se llega amás de pola crisis pola saturación del mercáu, contrasta colos meyores momentos del sector, a mediaos de los 90, cuando’l plazu máximu d’entrega podía llegar hasta los trés años. Responsables de los cinco talleres que nesti momentu trabayen de manera profesional n’Asturies analizaron la situación actual d’esta actividá en declaraciones a Europa Press. Namás en dos d’ellos nun se percibió descensu de producción o de llista d’espera: nel del gaiteru Vicente Prado ‘El Pravianu’ (Llugones), que trabaya por venta direuta y la so entrega suel ser nel actu, y el de Chus Solís (Llangréu), únicu que cuenta con producción en serie mecanizada, y únicu tamién que percibió un aumentu de productividá nos años últimos. El so plazu xubió nel últimu añu de los trés a los siete meses.
 
Solís vincula la meyora de la so actividá a la mecanización del so taller hai cinco años, cola compra de maquinaria pa la fabricación de gaites por pieces. Sicasí, la suya nun foi la única esperiencia nesti sen. La fábrica Les Xanes, en Santu Adrianu, zarró nel 2005 sin tener malpenes actividá, y la xestionada pol gaiteru José Ángel Hevia en Guadarrama, Arpha, corrió una suerte asemeyada. Amás de gaita asturiana, Solís produz otros instrumentos tradicionales, como la xeremía mallorquina, el sac de gemecs catalán o la gaita gallega, lo qu’ayuda tamién a aumentar la carga de trabayu.
 
El restu de los constructores que tán furrulando, Carlos Moreno (Xixón), Miguel Alonso (Colunga) y Fernando Mori (Uviéu), notaron baxaes, anque con distintes midíes. Mentes, otros dos históricos artesanos del instrumentu pararon la so actividá: Alberto Fernández Velasco, de Xixón, zarró'l so taller va unos meses y Diógenes García, d'Uviéu, xubilóse.
 
D’ente los fabricantes que notaron descensu, dalgunos acusaron la crisis un poco, como Fernando Mori o como Carlos Moreno –que nestos momentos tien encargos de gaita asturiana para Estaos Xuníos y Rusia–, o muncho, como Miguel Alonso, quien ta plantegándose'l zarru depués de que baxara la so llista d’espera a non más de dos selmanes. La falta de lliquidez de los clientes potenciales y la baxada de subvenciones a grupos y bandes tradicionales son dalgunes de les razones señalaes polos artesanos. Ello ye que les bandes foron nel so día los principales clientes del sector, tanto pa compra como p’arreglos.