La VI Carrera de la Muyer de Xixón yá tien 3.500 inscrites

Les muyeres van tomar les cais de Xixón esti domingu na VI Carrera de la Muyer, prueba que busca conseguir una mayor sensibilización col cáncer de mama. 3.500 persones yá tán apuntaes pa esta cita qu’espera axuntar a 4.500 corredores.
 
El plazu pa inscribise mantiénse hasta esti miércoles nes webs de Carrera de la Muyer y del Club de Fidelización de Central Lechera Asturiana, o na planta de deportes de los centros d’Hipercor n’Asturies. La salida de la prueba ta prevista pa les 10 hores de Les Mestes, mesmu llugar onde va terminar la carrera tres un percorríu de 5 quilómetros peles cais de Xixón. “Va ser una fiesta divertida, con un festival de aerobic y munches sorpreses na que tien sitiu toda muyer corredora, yá sía profesional o ensin esperiencia, y que da la posibilidá de correr en familia nuna de les categoríes esistentes: madre y fía, dos hermanes, trés hermanes, güela-madre-nieta, suegra-nuera, tía y sobrina, etc.”, espliquen dende la organización, que confirma la participación en Xixón de la presentadora Anne Igartiburu, madrina d’esti circuitu que pasó por Málaga, València, Madrid y Gasteiz, y que tamién va visitar Sevilla, Barcelona y Zaragoza.
 
El coste de la inscripción pa esta prueba ye de 5 euros. Según aseguren dende l’Asociación Carrera de la Mujer, esti añu van donar “50.000 euros a la Asociación Española Contra el Cáncer pa la investigación na so llucha contra’l cáncer de mama, siendo ya más de 320.000 euros los donaos pola organización dende l’aniciu del circuitu hai 7 años”.