Asturies ConBici y ciclistes uviedinos van celebrar San Xuan con un paséu peles fontes del conceyu

La ‘Marcha de San Xuan’, actividá entamada por Asturies ConBici y ciclistes d’Uviéu, va visitar esti xueves seis fontes del conceyu. L’oxetivu d’esta ruta ye celebrar San Xuan d’una forma diferente y promocionar l’usu de la bicicleta.
 
La cita pa les persones que quieran participar –ensin necesidá d’una inscripción previa– ye’l xueves, a les 19.30 hores, nel Cañu del Fontán, situáu na plaza de Daoiz y Velarde. D’ehí, los ciclistes van facer una ruta coles paraes siguientes: Fonte de San Lázaro, Cañu de Villafría, Fonte Cuatro Caños, Fonte de Pando y Fonte de Foncalada. La parada final va ser na plaza la Catedral pa celebrar la foguera de San Xuan.
 
Esta forma tán orixinal de vivir la nueche más máxica del añu ta abierta a tolos públicos y va permitir a los participantes conocer fontes del conceyu, munches vegaes desconocíes pola mayor parte de los uviedinos, y histories sobre estes construcciones y personaxes mitolóxicos. Los organizadores recomienden a les persones que quieran facer la ‘Marcha de San Xuan’ que lleven lluces na so bicicleta, un vasu pa beber en dalguna de les fontes y, sobre manera, que disfruten del percorríu. Tamién aconseyen enrramar la bici y facer usu de dalguna bengala al final del trayeutu pa “xunir l’agua col fueu”.