Ballesteros incorpora a FAC y PP al so equipu de gobiernu

Asturianistes por Nava va gobernar el conceyu navetu en comuña con FAC y PP. Les dos formaciones votaron a favor d’Emilio Ballesteros pa que’l candidatu de la formación asturianista algamara l’alcaldía.
 
Tres l’alcuerdu al que llegaron les tres formaciones, que dexen na oposición al anterior partíu nel gobiernu municipal, el PSOE, Ballesteros, amás de la función d’alcalde, va llevar los asuntos de Nueves Tecnoloxíes y Policía Llocal. Asturianistes por Nava asegura tamién les conceyalíes de Muyer y Servicios Sociales, y de Deportes y Asociaciones, que van tar en manes de Belén Fernández y Nisén Díaz. Pela so parte, Foro Asturias Ciudadano (FAC), tercer fuercia más votada, va llevar tres conceyalíes, dalguna d’ importancia, como Facienda, Patrimoniu y Personal (Cecilia Fernández). Ganadería, Mediu Rural y Obres (José Manuel Vigón) y Educación, Cultura y Emplegu (María José Rey), son les otres dos. Fernández, amás, va ser teniente d’alcalde.
 
Les otres dos conceyalíes restantes nesta llexislatura queden en manes del PP. José María Osoro va llevar la d’Urbanismu, Servicios, Turismu, Pymes y Festexos, y Noelia Cabo la de Participación Ciudadana.