Figareo y Ciañu acueyen actuaciones musicales n’asturianu esti vienres

Sambre y Misiva van tocar otra vegada xuntos, nesta ocasión con más grupos, nel I Rescamplu Rock Figareo. Mentes, en Ciañu, va haber un conciertu en solidaridá colos trabayadores d’Alas Alumium nel que van tocar I.R.A. y K-Nalón.
 
El I Rescamplu Rock Figareo, cita que va tener llugar nel parque Tartier a partir de les 21 hores, va llevar a esta población mierense de baldre a seis bandes asturianes, ente les que destaquen Sambre y Misiva, formaciones qu’utilicen la llingua del país nos sos cantares. Los dos grupos, a los que ye habitual velos tocando xuntos dao la bona rellación ente los sos integrantes, van compartir escenariu con Spicy Mustard & The Pickles (Uxo), Octopus Garage (Uviéu), Bajo Fianza (Mieres) y Nocivos (Mieres).
 
Mentes, nel Cine Ideal de Ciañu va celebrase un conciertu en solidaridá colos 12 trabayadores d’Alas Aluminium encausaos. Nél van participar Dentellada (punk, de Llaviana) y Intermezzo (metal, de la cuenca), amás d’I.R.A. (hardcore-punk, de Noreña y Llangréu) y K-Nalón (hip-hop combativu, de L’Entregu), dos grupos que canten n’asturianu. La hora d’entamu de les actuaciones ta prevista pa les 22 hores.
 
Otres actuaciones destacaes del vienres ye la de John Mayall (20 hores, Centru Niemeyer), con tol papel vendíu; la de los australianos Hard-Ons xunto colos llocales The Black Panthys Party y Eraserhead (22 hores, La Antigua Estación d’Uviéu); y la de Davila 666 y Los Explosivos (22 hores, La Calleja la Ciega d’Uviéu). Mentes, el sábadu, van actuar nel país The Groove Investigators (20.30 hores, Teatru Filarmónica), Kike Suárez y los Chicarrones del Norte (22 hores, Pub Nunca Jamás d’Uviéu) y Josele Santiago (22 hores, The Monkey Club de Xixón).
 
Otra manera, esti vienres va celebrase la tercer eliminatoria del I Concursu de Canción Asturiana Conceyu de Siero nel Auditoriu de La Pola Siero. La cita ye a les 20 hores y la entrada ye de baldre.