UNA califica de "provocación institucional" la xuba del presupuestu de la Xunta Xeneral

Unidá Nacionalista Asturiana (UNA) mostró’l so refugu a l’aumentu del presupuestu de la Xunta Xeneral pola xuba de les partíes a los grupos parllamentarios. “Ye una provocación institucional”, diz Yolanda Huergo.
 
La vocera de la fomarción remarcó que la decisión tomada na primer Xunta de Voceros tres la constitución de la Cámara “separta entá más a la ciudadanía de la clase política parllamentaria” y entiende como inaceptable que “en plenu procesu de retayos de prestaciones y derechos sociales, la Xunta Xeneral aprobara un aumentu del so presupuestu, lo que nun ye más que la constatación de que los parllamentarios asturianos viven fuera de la realidá del país”. Amás, Huergo entiende que los presupuestos aprobaos pon nuna situación bien delicada “a esta institución que va tener qu'esplicar a la ciudadanía por qué la mesma institución que-yos retaya aumenta los sos recursos”, daqué que calificó de “impresentable ya inesplicable”.
 
UNA tien claro que la contención del gastu “tien de centrase no superfluo, na eliminación de los chiringos fuera del control de gastu a que se someten a les Alministraciones Públiques, nel control de los presupuestos de les obres públiques pa esaniciar los típicos sobrecostos asturianos y acabar con gastos como la Fórmula-1 o'l fútbol profesional na TPA” y non nes “prestaciones públiques y nel retayu de derechos que namás lleven a un empobrecimiento xeneralizáu de la sociedá y una paralización del texíu productivu, como tamos viviendo anguaño”.