Feve entama una ruta turística nueva ente Xixón y Les Arriondes

El tren ‘Estrella del Cantábricu’ va facer una ruta turística nueva baxo’l nome de ‘Itinerariu de la Santina’. Ésta va xunir Xixón y Les Arriondes, y va permitir la visita a Cangues d’Onís y Cuadonga tolos domingos de xunu a setiembre.
 
El ‘Itinerariu de la Santina’ completa asina la ufierta de la empresa ferroviaria de vía estrecha pa esti branu, na que se mantién el ‘Itinerariu de la Biosfera’ –inaugurada nel 2007–, ruta que sal los sábados de Xixón y llega a Llaviana per tol valle del Nalón. Esta propuesta nueva de Feve va tener salida tolos domingos de xunetu, agostu y setiembre –menos el 7 d’agostu– a les 9.40 hores. Tres llegar a Les Arriondes, los viaxeros van dir n’autocar hasta Cuadonga, pa depués xintar nel Parador Nacional de Cangues d’Onís.
 
Yá pela tarde, van xubir al tren pa tornar a Xixón, onde ta prevista la llegada pa les 20.15 hores. Enantes, el ‘Estrella del Cantábricu’ va facer una parada en Nava pa que los viaxeros visiten el Museo de la Sidra. El preciu d’esti viaxe –tamién del ‘Itinerariu de la Biosfera’– ye de 59 euros por persona, 29 pa los menores de 14 años, y inclúi visites guiaes y la xinta.
 
José Antonio Rodríguez, direutor xerente de Trenes Turísticos de Feve, aseguró na presentación de los dos itinerarios asturianos que las rutas que propón la empresa n’Asturies, Lleón, Cantabria y Bizkaia tiene una “bon aceptación” y una ocupación del 90 por cientu. Dende la empresa esperen qu’estes rutes, orientaes tanto pa turistes como pa persones que residan nel territoriu pel que trescurre, continúe “nesa mesma llinia”.