Los trés deteníos n’Asturies por supuestos actos de terrorismu, en llibertá tres declarar na Audiencia

Eloy Velasco, xuez de l’Audiencia Nacional, dexó en llibertá a les trés persones deteníes n’Asturies por supuestos actos de terrorismu. El maxistráu considera’l delitu polos que foron acusaos como “daños” y non como “terrorismu”.
 
Los trés militantes del PCPE tornaron asina a Asturies tres ser treslladaos ayeri a Madrid. Taben acusaos de quemar dos caxeros de Caxastur en Riañu y Lada na madrugada del 15 de xineru mientres el conflictu llabora de Duro Felguera. En too momentu, los tres mozos, deteníos en Candás y Xixón, negaron tar implicaos nesa aición.
 
Según informó l’abogáu Raúl Turrero, el maxistráu desinhibese en favor del xulgáu d’instrucción númberu 1 de Llangréu, que va ser el que lleve’l casu. Los arrestaos nun var tar suxetos a nenguna midida cautelar. “El xuez Velasco ratificó la versión xurídica que nós dábamos dende la defensa y ye que en nengún casu los fechos son constitutivos d’un delitu de terrorismu del artículo 577 del Códigu Penal”, apuntó al mesmu tiempu que mantuvo la inocencia de los trés acusaos.
 
Mentes, otros dos militantes del PCPE de Mieres tán en llibertá con cargos pola mesma causa tres declarar na mañana del miércoles en comisaría. Les cincos persones tán viviendo estes xornaes la solidaridá de tola izquierda asturiana y de partíos comunistes d’otros países, que refuguen l’actuación policial.