Roberto Colunga, secretariu del Bloque, criticó la “caradura” de los partíos con representación na Xunta por non suprimir les partíes económiques a los grupos parllamentarios. L’ex diputáu propunxera quitar este subvenciones.
 
Según informó Colunga, estes subvenciones son “independientes a los gastos de personal, mobiliariu, útiles de oficina, coches, combustibles, etc.”, polo que considera un abusu por parte de FAC, PSOE, PP y IX-LV el manteneles. L’ex diputáu diz non entender que “n’époques de crisis, onde se recorta’l sueldu a los trabayadores públicos, onde todos los díes van al paru persones nueves, plantegen mantener casi 2,5 millones d’euros a los grupos parllamentarios y xubir agora’l sueldu al voceru axuntu de cada grupu”. Na llexislatura anterior, el Bloque por Asturies propunxera como Grupu Mistu, ensin resultáu final, “la supresión inmediata de les partíes económiques, garantizando que tolos grupos parllamentarios dispongan de los espacios físicos, elementos materiales y personal afayadizu y suficiente pa desendolcar con dignidá, igualdá, eficacia y la eficiencia máxima el so llabor parllamentariu y l’atención a los ciudadanos y ciudadanes”, recordó Colunga.
 
El secretariu del Bloque aprovechó tamién pa criticar que se aprueben estes xubes salariales y se mantengan tantos millones pa los partíos políticos cuando, a pesar de qu’esiste una sentencia de la Sala de lo Social del Tribunal Superior de Xusticia esixendo’l pagu de les ayudes sociales pa llibros, beques o pás con fíos con discapacidad por 1,2 millones de euros, ésta nun se cumpla “por falta de presupuestu”. La metá de les perres que destinen los partíos de la Xunta Xeneral a les partíes económiques a los grupos parllamentarios serviría pa facer frente a estos pagos.