Goñi quier facer de la Xunta Xeneral “un llugar d’entendimientu”

Fernando Goñi, presidente de la Xunta Xeneral dende esti miércoles, señaló tres el so nomamientu qu’espera que’l Parllamentu asturianu sía “un llugar d’entendimientu”. Pa ello ufre “diálogu y collaboración”.
 
El popular, pa quien presidir la Cámara nesta llexislatur “ye un honor”, añadió qu’esti diálogu ye “una obligación de toos pa collaborar cola recuperación económica”. “Quiero agradecer al mio partíu que me diera la confianza pa ocupar la presidencia, una presidencia que debe dialogar con toos para llegar a alcuerdos” dixo Goñi.
 
El presidente nuevu de la Xunta Xeneral recordó que nengún grupu parllamentariu tien la mayoría y, polo tanto, toos tienen la obligación de cumplir col mandáu de los ciudadanos y facer del Parllamentu “un llugar d’entendimientu”. Asina, insistió n’ufrir “entendimientu, llealtá y diálogu”.
 
“Nel Parllamentu asturianu reside la soberanía del pueblu”, señaló Goñi, qu’añadió que “espera acertar nel cumplimientu de los deberes que tenga”. El presidente nuevu concluyó asegurando que’l fechu de que “la presidencia recaiga nel PP entiéndese como un compromisu cola pluralidá, el diálogu y l’alcuerdu, como cuando el tamién popular Ovidio Sánchez presidió la Cámara nuna época na que tampoco había mayoría nel Parllamentu”.