La Policía detién a trés militantes del PCPE por supuestu terrorismu y treslládalos a l’Audiencia

La izquierda asturiana ta indignada pola detención de trés militantes del PCPE y el so treslláu a Madrid pa declarar na Audiencia Nacional. La Policía acúsalos por supuestos actos terroristes nel conceyu de Llangréu.
 
J.I.F.A. y V.R.G resultaron deteníos por axentes de la Brigada d'Información el martes pela tarde nel esterior de la sede nueva del Partido Comunista de los Pueblos de España en Asturies (PCPE-Asturies) de Carreño –conceyu onde la formación tien representación municipal– mentes taben pintando’l llocal. Una tercer persona, M.S.M.S, residente en Xixón, acudió de forma voluntaria a la comisaría de Policía nel barriu de Moreda alredor de la una d’esta madrugada depués de que los policíes nun lu atoparen na so casa. A toos ellos acúsase-yos d'un supuestu delitu de terrorismu, tipificáu nel artículu 577 del Códigu Penal, rellacionáu col llanzamientu de cócteles molotov contra una sede de Caxastur en Lada y otra de la mesma entidá en Riaño na madrugada del 15 de xineru mentes el conflictu llaboral de Duro Felguera.
 
Según informó l’abogáu de los tres acusaos, Raúl Turrero, J.I.F.A foi l’únicu qu’accedió a declarar nos interrogatorios policiales pa negar la so participación nos fechos. Turrero aseguró que “nengún d'ellos tuvo nestos dos llugares”, en referencia a Lada y Riañu, polo que “partimos de la so total y absoluta inocencia”. A los trés van treslladalos a les dependencies de l'Audiencia Nacional, onde mañana van toma-yos declaración.
 
Amás de los trés deteníos, esta mañana comparecieron de forma voluntaria nes mesmes dependencies policiales otros dos militantes del PCPE de Mieres a los que los axentes tampoco alcontraron ayeri nes sos cases. Acompañólos una abogada y, tres acoyese al so derechu a nun declarar, quedaron en llibertá con cargos pese a que los sos representantes xurídicos aseguraron desconocer los delitos de los que se-yos acusa y namás saben que pertenecen a la mesma causa de los otros trés militantes. Turrero informó amás de qu'esta actuación policial “respuende a unes dilixencies previes del Xulgáu d'Instrucción de l'Audiencia Nacional (dilixencies 125/2010) que desconocemos hasta mañana”, pero matizó que se trata de “una causa abierta ente xineru y febreru del 2010” cuando a “estes persones detuviéronles por unos fechos asocedíos en teoría en xineru del 2011”.
 
Tola izquierda asturiana refugó ayeri y güei la detención de los trés militantes del PCPE. Asina, formaciones y coleutivos como Izquierda Anticapitalista, Darréu, UNA, Famyr o la CSI asoleyaron comunicaos onde amosaron la so solidaridá colos acusaos. Tamién celebráronse delles concentraciones de protesta poles detenciones n’Uviéu y en Xixón qu’axuntaron a un bon puñáu de persones, movilizaciones que van continuar estos díes.
 
La solidaridá con estes persones tamién llegó de partíos comunistes de Grecia, México, Paraguay, Hungría y Francia al traviés de comunicaos que recibió la direición del PCPE, formación que va llevar l’asuntu a la Comisión de Derechos Humanos de la Xunión Europea al traviés de los eurodiputaos del Partíu Comunista de Grecia (KKE).