Carlos Rubiera, conceyal d’Educación, Cultura, Mocedá y Festexos de Xixón

L’asturianista Carlos Rubiera, númberu 5 na llista de Foro Asturias Ciudadano (FAC) a l’alcaldía de Xixón, va encargase de la conceyalía d’Educación, Cultura, Mocedá y Festexos. Tamién va presidir el Conseyu Asesor de la Llingua.
 
Esti miércoles celebróse la primer Xunta de Gobiernu Llocal, que tuvo presidida por Carmen Moriyón, alcaldesa de la ciudá que va llevar los asuntos d’Igualdá y Mediu Ambiente tres el repartu de conceyalíes, que nesta llexislatura va reducise a ocho. L’escritor, profesor y cantautor asturianista José Carlos Rubiera va tar al frente de la conceyalía d’Educación Cultura, Mocedá y Festexos y va presidir el Conseyu Asesor de la Llingua, el Teatru Xovellanos y la Fundación Municipal de Cultura, amás de ser teniente d’alcalde, al igual que los sos compañeros conceyales. Nesi sen, Rubiera va ser cuartu teniente d’alcalde tres Rafael Felgueroso –secretariu y voceru de la Xunta de Gobiernu–, Lucía García y Manuel Ángel Arrieta.
 
El resto de conceyales nesta llexislatura son Rafael Felgueroso (Seguridá Ciudadana), Lucía García (Urbanismu y Vivienda), Manuel Ángel Arrieta (Mantenimientu y Obres y Infraestructures); Eva María Illán (Bienestar Social), Pedro Javier Barbillo (Rellaciones Ciudadanes, Servicios de Proximidá y Deportes), María del Carmen Alsina (Alministración Pública y Facienda), y Fernando Couto (Desarrollu Económicu y Emplegu). Tamién repartiéronse les presidencias de distritos, que recaen toes en Pedro Barbillo.
 
Nel casu de les presidencies de les empreses municipales, Lucía García va encargase de la Empresa Municipal de la Vivienda, mentes que Eva María Illán va facer lo propio cola Fundación Municipal de Servicios Sociales y Fernando Couto cola Sociedá Mista de Turismu, el Centro Municipal d’Empreses, la EMA, Emulsa y el Xardín Botánicu Atlánticu.