Los indignaos de Barcelona impiden la llegada de diputaos al Parlament

Más de 2.000 persones aconceyaes nel Parque de la Ciutadella, frente al Parlament de Catalunya, impidieron la entrada de 70 de los 135 diputaos al edificiu. Esti miércoles celebrábase’l Plenu de los presupuestos.
 
La sesión principió a les 10.15 hores con 15 minutos de retrasu y un bon númberu d’escaños vacíos. Ello llevó a los diputaos presentes a entamar pol tercer puntu del orde del día, una comunicación sobre les meses de les comisiones y el debate de los presupuestos, y retrasar la sesión de control pa les 16 hores. Ente les persones que consiguieron entrar nel hemiciclu, dalgunos n'helicópteru, taben Artur Mas, presidente de la Generalitat; Joaquim Nadal, llíder de la oposición; y dellos conseyeros como Andreu Mas-Colell y Boi Ruiz, mentes qu’otros foron llegando poco a poco. Pela so parte, un grupu de trenta diputaos abellugáronse nuna comisaría cercana al nun poder acceder al Parlament.
 
Nel esterior, los manifestantes, n'actitú de resistencia pasiva, glayen conseñes como “Nun mos representen” y tuvieron urriando a los trabayadores qu'entraben nel Parllamentu catalán pela entrada de la confluencia de les cais Wellington y Pujadas. Tamién cantaron L’Estaca. 400 axentes de la Brigada Móvil de los Mossos d'Esquadra y efeutivos de la Guardia Urbana desplegáronse na zona.