FAC y PP ruempen les negociaciones tres nun algamar alcuerdos

Foro Asturias Ciudadano (FAC) y Partido Popular (PP) nun llegaron alcuerdos esti martes tres delles hores de reunión. Les dos formaciones ruempen asina les negociaciones pa garantizar la "gobernabilidá" del Gobiernu d’Asturies.
 
La reunión de FAC y PP principió a les 21 hores, tres mantener una reunión previa a les 19 hores, y terminó pasaes les 23.30 hores. Dende’l partíu llideráu por Francisco Álvarez-Cascos reprocharon al PP que centrara l’aconceyamientu en conseguir la Presidencia de la Xunta Xeneral, yá que, según anunciaron diputaos de FAC, les negociaciones debíen profundizar nes necesidaes sociales, económiques y institucionales del país y non en poner “a una persona determinada nun cargu determináu”. Por esti motivu, Foro Asturias refugó la propuesta del PP que tamién incluyía la Presidencia del Parllamentu pa los populares, l’apoyu a los candidatos de FAC para la vicepresidencia y la secretaría de la Mesa de la Xunta y el sofitu esplícitu, colos sos votos, a la eleición d’Álvarez-Cascos como presidente d’Asturies.
 
A ello hai que sumar “l’aniciu de conversaciones p’alcanzar un pautu de llexislatura que garantice la estabilidá y gobernabilidá del Principáu d’Asturies sobre la base d’un programa común y la forma de ponelu en práutica”. Mentes, los populares refugaron la propuesta de Foro Asturias no rellativu al pautu de llexislatura yá que, pa la candidata del PP, Isabel Pérez-Espinosa, tratábase d’un “cheque en blanco”, de puntos “xenerales” nos que nun se detalla’l programa. “Naide va a poder achacar al PP que temos torgando que la fuercia política que tuvo más votos nes eleiciones sía la que presida’l Gobiernu del Principáu”, puntualizó.
 
La sesión constituyente de la Xunta Xeneral va celebrase mañana, a les 12 hores, y tovía nun ta nada claro cómo van repartise los cargos de la Mesa. FAC mantién, pel momentu, la decisión del so grupu parllamentariu de proponer la candidatura d’Enrique Álvarez-Sostres a la presidencia de la Xunta Xeneral. La formación d’Álvarez-Cascos confía tamién en Pelayo Roces y Cristina Coto como candidatos a la vicepresidencia y secretaría de la Cámara, de manera respeutiva.