Foro Asturias garra’l gobiernu municipal de Xixón y De Lorenzo mantiénse como alcalde d’Uviéu

L’apoyu del PP de Xixón permitió a Carmen Moriyón (FAC) convertise n’alcaldesa. N’Uviéu, De Lorenzo consiguió mantenese al frente del Ayuntamientu, mentes que nos conceyos con representación asturianista nun hubo sorpreses.
 
Pese a que la orde del PP nacional y estatal yera nun apoyar nenguna alcaldía de Foro Asturias Ciudadano (FAC), en Valdés, Salas, Amieva, Cabrales y Xixón les direiciones llocales populares desobedecieron les indicaciones d’arriba y decidieron apoyar gobiernos de dereches. Asina permitieron, por exemplu, terminar con 32 años de gobiernu del PSOE en Xixón, onde l’alcaldesa nueva ye Carmen Moriyón pese a nun llegar a nengún alcuerdu col equipu de Pilar Fernández Pardo. De nun contar col apoyu de los cinco conceyales del PP, Santiago Martínez Argüelles ocupara l’alcaldía al ser el llíder de la llista más votada en Xixón.
 
Esi casu foi’l qu’asocedió n’Uviéu, yá que De Lorenzo namái recibió los votos de los once conceyales de la so formación y la oposición nun llegó a alcuerdos pa quitar del poder al alcalde de la ciudá dende 1991. FAC votó al so candidatu, Oviedo por la izquierda al suyu y el PSOE decidióse pola astención. Sicasí, Arturo González de Mesa (FAC) señaló que’l mandatu de De Lorenzo, ensin mayoría absoluta, va durar poco tiempo y qu’él va tar llistu pa tomar l’alcaldía nesi momentu.
 
Otra manera, nos conceyos onde les fuercies asturianistes tienen representación nun hubo sorpreses. En Carreño, Ángel Riego (PSOE) continúa como alcalde al lliderar la llista más votada. FAC tuvo negociando con UNA-Bloque por Asturies hasta l’últimu momentu p’algamar el so apoyu, anque al final nun hubo alcuerdu y Roberto Holgado votóse a sí mesmu, como’l resto de formaciones. Mentes, en Ḷḷena, onde los nacionalistes tienen un conceyal, salió alcalde Ramón Argüelles (IX-LV), que tenía mayoría absoluta.
 
En Valdés, Balbino Suárez (Unión URAS-PAS) collaboró a acabar cola etapa ‘socialista’ na Casa Conceyu tres retirar la so candidatura y apoyar a José Modesto Vallejo (FAC) como alcalde, mesma aición que fixeron los conceyales del PP, desobedeciendo asina’l mandáu d’Ovidio Sánchez. En Bimenes, la mayoría absoluta del Bloque Independiente de Bimenes (BIB) nun dio protagonismu al conceyal asturianista.
 
Pablo Pérez, conceyal de Conceyu Abiertu por Noreña, apoyó a Independientes por Noreña (IPN) col oxetivu d’echar al PSOE de l’alcaldía del conceyu, anque al final César Movilla repite como primer edil al ser la llista más votada. Movilla namái contó col sofitu del conceyal d’Independientes de Asturias (Ideas). En Morcín, l’astención de la formación asturianista Asociación Morciniega Independiente (AMI), PP y FAC permitieron a Jesús Álvarez Barbao (PSOE) repetir al frente del conceyu. IX-LV presentó al so candidatu p’alcalde.