Xixón vive esti sábadu la Gran Nueche Celta y Villamayor los conciertos de Sambre y Misiva

Chus Pedro, los irlandenses Altan y los escoceses Capercaillie van protagonizar la Gran Nueche Celta de la Llaboral esti sábadu en Xixón. Esi mesmu día, el Benidorm de Villamayor va acoyer los conciertos de Sambre y Misiva.
 
La cita del Teatru de la Llaboral va principiar a les 20 hores cola actuación de Chus Pedro, un conciertu que va servir de presentación de los cantares del so discu nuevu de nome ‘Nenita’. Tres el de L’Entregu van xubir sobre les tables Altan, grupu de cultu n’Eire qu’esti añu cumple 25 años, pa llueu dar pasu a Capercaillie, banda perconocía dientro y fuera d’Alba. La entrada pal espectáculu ye de 25 euros nel anfiteatru y de 30 nel patiu de butaques y resto de zones del teatru.
 
Tamién el sábadu, nesti casu nel restaurante Benidorm de Villamayor, van ufrir un conciertu conxuntu les bandes Sambre y Misiva. Va ser dientro del segundu alcuentru moteru Custom Asturies, eventu entamáu por Astur Kustom Kulture que va axuntar en Piloña a aficionaos al motor de dellos puntos del Estáu. Esti conciertu de dos de los grupos que más tán medrando nos años últimos dientro de la escena rock n’asturianu va principiar a les 23 hores.
 
Otres actuaciones interesantes d’esta fin de selmana son les d’Obús (21 hores, Tribeca d’Uviéu) y The Big Plunge (23 hores, Monkey Club de Xixón), el vienres; y les de Raphael (20 hores, Palacio de Deportes de Xixón), The Punishers y Hangin' Balls (20 hores, La Antigua Estación d’Uviéu) y Horn of the Rino y Gälernå (21 hores, The Class de Xixón), el sábadu.